Hezeguneen munduko eguna eta Aieriren berreskurapena

Otsailaren 2an, Ramsar hirian (Iran) 1971n hezeguneen nazioarteko eguna sinatu zela gogorarazten digula aprobetxatuz, planetarentzat hain garrantzitsuak diren baina hain degradatuta dauden zonaldeez ohartarazi nahi dugu, eta benetan duten garrantzia eman.
Datu bezala, esan behar da, mende honetan Euskal Herriko duna eta hondartzen % 75 desagertu direla. Gure itsaspadurak politikari desarrollisten, espekulazio basatiaren, kutsadura eta ezjakintasunaren biktima dira.
Urrats bat gehiago eman nahi dugu ekosistema horien balio izugarriaz eta ekosistema horiek berreskuratzeak duen garrantziaz kontzientziatzeko lanean. Zehatzago esanda, gure hezegune hurbilenean, hau da, Aieriko paduretan.
Kostaldeko hezeguneak, ur geza eta gazia nahastean, biodibertsitatearen aberastasunagatik ez ezik, itsas organismo askoren freza, hazkuntza eta elikadurarako lekuak ere badira, eta, aldi berean, elikagaiak eta bestelako materialak ematen dizkiote itsasoari. Hori dela eta, oso garrantzitsua da babesa ematea jasaten dituzten hirigintza-garapenen gehiegikerien aurrean.
Aieriko mareen txandakatzeak, aldian behin, har, molusku eta krustazeo ugariko lohiak uzten ditu agerian. Hegazti limikolak, hala nola Ostrero Euroasiatikoa, Correlimos Komuna eta Zarapito Real, horietaz elikatzeko erabiltzen dituzte beren mokor espezializatuak.

Neurri txikikoak diren arren, Aierin euskal paduretako hainbat landare eta animalia bereizgarri kontserbatzen eta babesten dira. Landareei dagokienez, Aster tripolium, Juncus maritimus edo Elymus pycnanthus aurki daitezke; eta bitxiena Salicornia obscura. Planta hori, Bizkaia, Gipuzkoa eta Arabako lurraldeak kontuan hartuta, Txingudiko paduretan baino ez dago.
Hezeguneetako animalia bereizgarri batzuek ere Aieri aukeratu dute bizileku gisa. Aipamen berezia merezi du bisoi europarrak. Mundu mailan desagertu beharreko espeziea izanik, Arriskuan dauden Espezieen Euskadiko Katalogoan katalogatuta dago. Azkonarra, urretxindorra, ubarroi mottoduna, lertxuna eta beste hainbat animalia ere aurki daitezke.
Aieriko hezegunea ez dago Nazioarteko Intereseko Hezeguneen Zerrenda Orokorrean sartuta, baina garrantzitsua da, eta, beraz, haren kontserbazioa. Ildo horretan, Natura 2000 Sare Ekologiko Europarrean sartuta dago. Horren arabera, Zaintza Bereziko Guneen zerrendan eta Babes Bereziko Guneen zerrendan sartuta dago.
Oraindik badago zer eginik jendearengana iristeko. Azpimarratzekoa da, gaur egun kontzientziazio handirik ez badago ere, lehen ez zegoela bat bera ere. Horregatik da garrantzitsua instituzioak inplikatzea orokorrean ezagutzen ez diren balio ekologiko horiek dibulgatzen.

Klima-larrialdiko eta klima-aldaketako egun hauetan, kostaldeko hezeguneek aldaketa horiei aurre egiteko duten balioa nabarmendu nahi dugu.
 
Mende honen amaierarako, gure kostaldeko itsas maila 29 eta 49 zentimetro artean igo daiteke, «metro erdi», kasurik ezkorrenean.
Euskal kostaldearen zatirik handiena itsaslabarra da eta, beraz, itsas mailaren igoerari aurre egiteko defentsa lerro bihurtzen du. Baina kostaldeko biztanle gehienak estuarioetan daude, Ondarroan bezala, topografikoki baxuenak diren eremuetan, hau da, uholde arrisku handieneko eremuetan. Beste horrenbeste gertatuko litzateke Arrigorriko hondartzarekin, egungo zabaleraren % 40raino gal bailiteke.
Estuario horietan itsas mailaren igoera hori geldiaraziko lukeen birsorkuntza natural bat aplika liteke, padurak eta dunak aprobetxatuz, eustorma gisa jardutera iritsiz. Era berean, arrisku horren aurrean modu naturalean egokitzeko neurri gisa, eta gainera, erantzun azkar batekin.                   Hezeguneak ere karbono-biltegi (hustutegi) garrantzitsuak dira. Munduko lurreko karbonoaren % 40 ere izan daiteke.

Horregatik guztiagatik, Aieriko hezegunea da gure aliaturik onena, eta etorkizunean «hondamendi naturalak» saihesteko aukera ematen du. Izan ere, prezipitazio handiak mantentzen ditu, ibaian behera uholdeak saihesten ditu, ura lurrean biltegiratzen du edo gainazalean atxikitzen du, eta landarediak ur goraldietako uren zirkulazio abiadura murrizteko funtzioa ere bete dezake.                                                                        
Gainera, marismak basoetako bizitzaren erreserban parte hartzen dute eta hango biodibertsitatearekin lotura zuzena dute. Honek zentzudun aisialdi eta turismo baten aukera eskaintzen digu. Eta, horrela, kultura, ohitura eta paisaia ikuspuntutik ere balio handia duen altxor bat zaintzen dugu.
Itsaspadura hauek ez ditugu ikusi behar lokatz eta belar zahar multzo baten moduan. Eta etekin hauetaz baliatzeko degradatutako itsaspaduretako ekosistema birsortu eta berrindartzen ahalegindu beharko ginateke.
 
Ingurugiroaren babesa ez da planteamentu erromantikoetan eta aditu eta espezialisten galdekizunetan oinarritu behar bakarrik. Ingurugiroa ongi gestionatuz herritarren ongizatea lor genezake eta, sentimentu hau, denok dakigun bezala, ez da eurotan zenbatzen.                                         
Beraz, Eusko Jaurlaritzaren Hezegune Katalogoan sailkatuta dagoen Ondarroako Aieri padura berreskuratzeko esfortzua egitea oso garrantzitsua da. Hezeguneak kinka larri honetatik ateratzeko, behar-beharrezkoa da babesteko eta berreskurapen lanak martxan jartzea.
Berreskurapena ekosistema degradatu bat, perturbazio aurreko baldintzetara ahalik eta hobekien bueltatzea da. Berreskurapenaz batera normalean sorrera eta goreste lanak ere ematen dira. Sorrera, hezegune ez den gune bat hezegune bilakatzea da, eta gorestea berez hezegunearenak diren funtzioak eta murriztu edo  galdu direnak, berriro ere martxan jartzen laguntzea.
Padura berreskuratuz gero, haur eta gazteen hezkuntzarako ekintzak gara daitezke, bai zuhaitzen landaketan hasiera bat emanez (adb.: Zuhaitzaren eguna bezalako ekintzak), espezieen identifikazioan oinarri xamur bat emanez edo, eta garrantzitsuena dena, hezegune eta gure kasuan padurek duten garrantzia ekosistemen zikloan ulertzen laguntzea.
2012an, borroka luze baten ondoren, zonaldean 480 etxebizitza eraikitzeko proiektua geldiaraztea lortu zen, eta bere garaian ospatu genuen. Urte batzuk pasatu ondoren ordua iritsi da berreskuratzeko.
Egun Aieri padurak duen hedadura hain da txikia, benetan ekosistema osasuntsu bat mantentzeko ez dela nahikoa. Beraz, lehendabiziko lana lur eremu handiago bat lortzea da berreskurapen plana martxan jartzeko.  
 Orain munduan garatu diren berreskurapen planen esperientzia ezagutuz, argi eta garbi   esan dezakeguna zera da: bi urtetan ez dugula padura berreskuratzea lortuko, bai ordea berreskurapen prozesua martxan jartzea eta gauzak horrela urtez urte padura egonkor eta hobeagoa bat lortzea.

Eguzkitik salatu nahi dugu Artibaiko itsasadarrean dragatutako lohiak portuan isuri direla

Eguzki talde ekologista garen aldetik, Ondarroako portu erdian hondarra eta lohiak ateratzen ari diren dragak egiten ari diren isurketak salatu nahi ditugu.
Egun argiz gertatu denez, pertsona asko izan dira lekuko. Beraz, hainbat kexa izan ditugu gai honen inguruan.
Ez dakigu dragak zenbat aldiz isuri dituen lohi horiek portuan, baina gutxienez bi aldiz ikusi dira larunbat eguerdian bertan.
Isurketa horiek hain arduragabe ez egitea eskatzen dugu. Kostaldetik urrunago egitea eskatzen dugu, bai eta lohiak aztertzea ere, eta, horren arabera, lohiak nora eramango diren erabakitzea. Kutsatuta ez badaude, bota ditzatela badiatik urrun. Eta kutsatuta badaude, hondakin arriskutsu gisa tratatuko dira, modu egokian kudeatzeko.

PARDELAK BIRZIKLATZEKO ORDUA HELDU DA

Pardelak eta higiene produktuak zabor bilakatzen ditugun emergentzia klimatikoko garai hauetan, pausu bat aurrera egiteko ordua heldu da. Gainera, prest gaude horretarako. Gipuzkoan bada Birzitek deituriko empresa bat Goierrin, pardelak eta higiene produktuak birizklatzeko gaitasuna duena. Teknologia eta ezagutza baditugu, baita lehengaia ere, zeren zain gaude?

Gipuzkoan 20.000 bat tona hondakin suposatzen dute pardelek eta higiene produktuek. Hondakinak ondo bereiztu eta gero geratzen den errefuxaren %70 direlarik produktu hauek. Pausu hau emateak mundu mailan erreferentzi bat piztea litzake ere. Geure burua erreferente bezela nabarmentzea.

Gipuzkoako Foru Aldundiak bere baitan birziklapenaren Kluster bat dauka. Bertan birziklapenarekin zerikusia duten enpresen multzo batez osaturik dago. Tartean Birzitek. Kluster hau 2016an sortu zuten eta beraien hitzetan I+G+B sustatu nahi dute eta hondakin politiketan eragin, berrerabilpen eta birziklapen ereduak sustatuz.

Honi gehitu behar zaio udalerri askotan produktu hauek bereizita jasotzen direla, mankomunitateka herri kopuru hauetan jasotzen dira: Sasietan (16 herri), Tolosaldea (4), Urola Erdia (1), San Marko (3) eta Debagoiena (2)

Beraz ideia badaukagu, teknologia eta gaitasuna baita ere, lehengairik ez da falta eta bilketa bereiztua ere egiten da. Orduan, zergatik ez da abian jartzen pardel eta produktu higienikoen birziklatzea?

Gai honek bere biziko garrantzia du eta iruditzen zaigu GHK (hondakinen kontsorzioak) bere kargu hartu behar duela prozesu honen gidaritza eta ejekuzioa. Herritar askok ondo jokatzen dute hondakinen bereizketaren kasuan eta haratago joan nahi dute pardelak ere birziklatuz. Gizartearen eskaera bat da. Zerbitzu honek eskeiniko lukeen lorpen gehigarri hori pizgarria da Gipuzkoarentzat zein bere herritarrentzat, norabide onean beste urrats bat. GHK-ri prozesu honen berehalako funtzionamendua abiatu dezan eskatzen diogu.

BABES BILA:
Gipuzkoako ingurumen diputatuak gai honen inguruan adierazi dadin sinadurak jasotzen gaude osoigo.com plataformaren bidez. Izena eman eta ondorengo estekan babesa eman behar da:

https://www.osoigo.com/es/ipar-haizea-zergatik-ez-du-ghk-k-pardelak-birziklatzeko-zerbitzuaren-prozesua-abiatzen-por-que-no-inicia-ghk-el-proceso-para-ejecutar-el-reciclaje-de-panales.html?u=26253 500-era iristean publikoki erantzungo digu.

Garbigune mugikorrak jarri dira Ondarroan

HITZA.Garbigune ibiltaria bi astez egongo da Ondarroako Alamedan, Kafeatze pasealekua hasten den tokiaren parean. Urriaren 5era arte, 24 orduz eta nahieran, hondakin bereziak modu zuzenean batu eta birziklatzeko aukera edukiko dute ondarrutarrek, herritan bertan eta garbigunera joan beharrik eduki barik. Bizkaiko Foru Aldunditik azaldu dutenez, “birziklapenaren kontzeptua Bizkaiko herritarrentzat errazagoa eta hurbilago” egitea da garbigune mugikorren helburua. “Asmoa da ohiko garbiguneetara joateko aukera emateaz gain, udal mugarte barruan bertan ere egin ahal izatea”.
Edukiontzi horietan etxeetan sortutako hondakinak jasoko dituzte. Gogorarazi dutenez, ezin dira tresna handiak laga, soilik edukiontzian sartzen direnak onartutako direla esan dute. Honakoak dira onartutako hondakinak: etxetresna txikiak, sukaldeko tresneria, etxeko olioa itxitako ontzietan, telefono mugikorrak, kableak, margoak eta disolbatzaileak, aerosolak, kutsatutako xurgatzaileak, tonerrak, tintazko kartutxoak, metalezko kapsulak, plastikozko kapsulak, pilak, CDak, DVDak, kaseteak eta erradiografiak.
Eguaztenetik (23) aurrera foruarrek ere garbigune mugikorra izango dute udalerrian. Eguaztenean jarri dute eta urriaren 6ra bitartean egongo da; Torre Barri kalean kokatuko dute garbigune mugikorra, farmaziaren ondoan, hain zuzen ere.
……………………………………………………………………………
Aldundiak garbigune mugikorren zerbitzua ematea positibotzat  ikusten du Eguzkik. Birziklatzea herritarren artean sustatzeko zerbitzu bat herritarren eskura ipintzea onuragarria da, baina zerbitzu hori lantzean-lantzean eskaini barik, modu iraunkorrean eskaini beharko litzatekeela uste dugu. Horretarako, Debabarrenean egiten den modura, herri bakoitzean puntu garbi bana jartzeko eskaera egin dugu.
Herritarrei hondakinak uzteko oraindik ere erraztasun gehiago eman behar zaie. Modu horretara gehiago eta hobeto birziklatuko litzatekeela uste dugu. Ondarroan, esaterako, gure aldarrikapen historikoetako bat da herrian bertan garbigune finko bat eraikitzea.
Bere garaian, saihesbidea amaitu ostean Errenteria auzoan garbigune bat eraikiko zutela agindu zigun Aldundiak, eta oraindik ez da gauzatu.
Garbigune finko bat eraikitzea ezinezkoa baldin bada, modu ibiltarian erabiltzen diren garbigune mugikor hauetako bat modu iraunkorrean jartzea eskatzen dugu. Bizkaiko udalerri guztietan, gutxienez, halako zerbitzu bat ematea komenigarria izango litzatekeela iruditzen zaigu.

Pampako plumeroari STOP !!

Gero eta maizago ikus daiteke gure inguruan landare inbaditzaile-mota guztiak ugaritzen ari direla. Oraingo honetan, landare jakin bati erreparatuko diogu. Populazioaren artean ezagunagoa da, ziurrenik, bere ikusgarritasunagatik, Panpako Plumeroa deitua dena.

  Egokitzeko duen gaitasuna dela eta, erraz ugaltzen da eta azalera berriak modu geldiezinean kolonizatzen ari da, kasu askotan bereziki sentikorrak direnak, hala nola parke naturalak, biotopo babestu aitortuak, jolasguneak, ondare-mendiak eta onura publikokoak.

  Cortadeira Selloanak garapen ikaragarria lortzen du baldintza baikorretan; landara oin batek 3,5 metroko diametroa eta 4 metroko altuera izan ditzake, nahiko erraz. Mokor bakoitzak ehun mila hazitik gora daramatza, eta haizeak 30 km inguru zabal ditzake.

  Paisaia desitxuratzeaz gain, landarearen arazo espezifikoa da dibertsitate biologikoa murrizten ari dela, habitat irekiak kolonizatzen dituelako eta horietan espezie nagusi gisa ezartzen delako.

  Bereziki azkar hedatzen da errepideetako ezpondetan, hazia azkarrago barreiatzen baita ibilgailuek bertatik zirkulatzean sortzen dituzten haize-korronteei esker. Gainera, espezie oportunista denez, lehen mugituta zeuden lurretan uzten da nagusiki.

  Hala ere, Aldundiek eta Eusko Jaurlaritzak hainbat urte daramatzate eremu jakin batzuetan jarduten, eta oso noizean behin. Gure ustez, eremu horiek gure lurralde osora zabaldu behar dira, eta landare inbaditzaile hori desagerrarazteko lanen erritmoa handitu behar da. Erraz egiazta daitekeenez, landare hau, desagerrarazi beharrean, oso modu kezkagarrian hedatzen ari da.

  Zenbat eta denbora gehiago galdu horiek desagerrarazten, orduan eta handiagoa izango da ekonomia eta ingurumen kostua.

  Horregatik, Busturialdeko, Lea Artibaiko eta Mutrikuko udal guztiei eskatzen diegu har ditzatela beharrezko neurriak, ahalik eta lasterren, espezie horren hedapenarekin amaitzeko. Era berean, dibulgazio-kanpaina bat egin behar du herritar guztien eta lursail partikularren jabeen artean, landare horrek duen arriskuaz jabetu daitezen eta landare hori geldiarazteko nola jokatu jakin dezaten.

  Herritarrei eskatzen diegu, halaber, lumontzi horiek apaingarri gisa politak izan arren, ez dezatela engainatu. Gogoratuz legez debekatuta dagoela garraioa, jabetza eta merkataritza. Eta lursailen jabeek nahitaez desagerrarazi behar dituztela.

  Mendian ibili eta lumazaleekin topo egiten dugunean, ondo legoke «lantzak» moztu eta poltsa batean sartzea haziak ez sakabanatzeko.

  Behar izanez gero, gure lankidetza osoa ere eskaintzen dugu. Bitartean, gure Auzolanekin jarraituko dugu, aste honetan Ondarroan egin den bezala, baina kontuan hartuta jarduera zehatzak direla eta sentsibilizazioa dela helburu nagusia.


 EGUZKI

Auzolanean Plumeroak mozten Eroskiko lurretan

ARRASTE PELAGIKOA, SARRASKIAK JARRAITZEN DU

EGUZKItik aurten ere deitoratu behar dugu arraste-ontzi pelagikoak gure kostaldean dabiltzala. Urtetik urtera gero eta gehiago dira, gainera.

Izan ere, ostegun honetan, hilak 5, HAMABI pelagiko irlandar zenbatu ditugu Ondarroako portuan. Hau onartezina da, urtetik urtera marka hautsi nahi dutela dirudi. Den-dena suntsitzen ari dira.

Sare pelagikoen erabilera debekatuta dago bai Espainiako bai EAEko uretan, arrantza mota honek den-dena harrapatzen duelako eta, ondorioz, deskarte handia sortzen duelako. Beraz, ez da jasangarria, arrantzalekuak eta ekosistemak agortzen ditu.

Azken batean, arrantza mota hau bi ontziren artean inbutu moduko sare bat arrastatzean datza. Kontuan izan behar da sare-inbutu hauek oso-oso handiak direla. Futbol-zelai baten neurriko ahoa ere izan dezakete. Eta, jakina, bidean aurkitzen duten guztia harrapatzen dute, bai espezie objetivo komertzialak, bai espezie ez-komertzialak, bai espezie babestuak ere, hala nola, dortokak, izurdeak eta beste. Harrapatutako asko deskartatzen da, komertziala ez delako, sareetan denbora gehiegi pasatu delako edo azpian egonda zanpa-zanpa eginda geratu delako. Eta deskarte hori guztia berriz ere itsasora doa, hilik baina.

Kantauriko arrantzaleek, aldiz, hegaluzeak kanaberaz edo xaxian harrapatzen dituzte, artisau-tresnez, alegia. Horrela, aleak banan-banan arrantzatzen dituzte, deskartea saihestuz.

Lehengo egunean, artsiau-ontzien tripulazio erdia ere ez duten pelagiko bikote horietako batek 90.000 kilo hegaluze baino gehiago deskargatu zituen Ondarroan. Pieza gehienak birrinduta zeuden. Kiloa 2-3 euroan salduko zieten Urlapesca eta Ondarroa19 bezalako handizkariei. Ondoren, Kofradiatik igaro ere egin gabe, merkataritza-gune ezagunetara eta “gure” kontserba-fabrika gehienetara joango ziren. Fabriketan latetan sartu eta dendetan kiloa 16-21 euroan salduko dute, kanaberaz banan-banan arrantzatutako hegaluzea balitz bezala, noski. Sare pelagikoz harrapatutako hori hegaluzea da, bai, baina ez du zerikusirik kanaberaz harrapatutakoarekin, ez kalitateagatik, ez itsasoarekiko eta itsas faunarekiko errespetuagatik, ez, oro har, bataren zein bestearen atzetik dagoen aztarna ekologikoagatik.

Baina gure kostaldean pelagikoekin arrantzatzea debekatuta badago, zer egiten dute arraste-ontzi hauek, gehienak frantsesak eta irlandesak, gure portuetan? Teorian, nazioarteko uretan jarduten dira, europar legediaren anparoan, nahiz eta batzuetan kostatik 12 miliatako muga ere gainditzen duten, hau da, legea urratzen duten.

Gauzak horrela, konpromiso handiagoa eskatzen diegu Espainiako eta EAEko administrazioei. Gure ustez, deskarteekin, kuotekin, deskargatzeko aldez aurretiko abisuekin eta lonja-pasatzeekin zorrotzago jokatu beharko lukete. Halaber, EAEko administrazioari eskatzen diogu trazabilitatea bermatzeko, hegaluzea non arrantzatu den, nola, zein ontzik arrantzatu duen eta zein portutatik datorren argi eta garbi identifikatuz.  Bai freskoan, bai latetan, eta laten kasuan arrain freskoa edo izoztua erabili den zehaztuz. Eta informazio hori kontuan izanda, kontsumitzaileak aukeratu dezan nolako arraina erosi nahi duen.

Horrela, kontrol zorrotzagoa balego, pelagikoei eta handizkariei murriztuko litzaieke gure portuetan negozio egiteko aukera.

Trazabilitatea bermatzea arrantzaleen aldarrikapen nagusietako bat ere izan beharko litzateke, gure uste apalean. Eta kontsumitzaileona, jakina, funtsezkoa baita kontsumitzaileok arraindegian egitea itsasoan modu jasangarrian harrapatutako hegaluze horren alde. Kontzientzia-kontua.

Esan dezagun, bide batez, arrantza “olinpikoa” deritzona (“iristen den azkena ergela da” esaldian laburbildu daitekeena) akats bat iruditzen zaigula. Batetik, arrantzaleak zukutzen ditu, orain dela urte batzuk baino denbora erdian arrain kopuru berdintsua harrapatzera behartzen baititu. Bestetik, kuota bi hilabete eskasetan kontzentratzen du, ohiko kontsumo-garaia nabarmen murriztuz. Horrek erosle handien boterea areagotzen du.

Egun gutxi barru, Kantauriko arrantzaleek kupoa agortuko dute. Hortik aurrera, pelagikoek bakarrik jarraitu ahal izango dute arrantzan. Beraz, gure etxeetan eta ostalaritzan kontsumituko den hegaluze freskoa pelagikoa izango da, ez euskal arrantzaleek banan-banan arrantzatutakoa. Ulertezina.

Gustatuko litzaiguke Arrantza kontseilariordeak eta Arrantza zuzendariak hemen aipatu ditugun puntu hauek guztiak kontuan hartzea hegaluzearen kanpainaren balantzea egiten dutenean.

Aurten Ondarroak lonja berria estreinatu du, baina garbi dago ohitura txarrak mantentzen direla.

SARE PELAGIKORIK EZ!

Eguzki Talde Ekologista eta Antinuklearra, 2021eko abuztuaren 6an

Mendexako Marierrota zain dezagun !!

Eguzkitik salatu nahi dugu  arduragabeko batzuen jarrera baldarra boteiloia egiterakoan  Lea-Artibaiko Kontserbazio Bereziko Eremuan (KBE). Izan ere uztailak 11an, Mendexako Marierrotan, boteiloi baten osteko ondorio latzak agertzen zaizkigu bideo honetan. Lea ibaiaren lezkadi garrantzitsuenaren ondoan hain zuzen ere. Penagarria eta sinestezina gertatutakoa.

Mutrikuko Mijoako erreka saneamendu-sare eraginkor batekin babestuko dugu

Mijoako errekastoaren saneamendua duela hamar urte baino gehiago amaituta egon behar zenean, isurketek zigorgabetasun osoz jarraitzen dute. Ikusten da Eusko Jaurlaritzak beste lehentasun batzuk dituela. Are okerragoa dena, enpresak handitu nahi dira, egungo araztegia egungo isurketetarako nahikoa ez dela jakinda. Noiz arte?

  EGUZKItik salatzen jarraitzen dugu eta Mijoako erreka defendatzen jarraituko dugu bere osotasunean errespetatu arte. Nahikoa da!

Ondarroako HAPOren aurrerakinari dozena bat ekarpen inguru egin dizkio Eguzkik

Ingurumen ikuspegia kontutan edukita, HAPOn txertatzeko hainbat proposamen egin ditugu. Besteak beste, Aieri padura ingurua «behingoz» berreskuratzea eta hondakin uren sarera konektatzea falta diren tarteak lehentasunezko gai modura hartzea eskatzen dugu.

Udalerriko lurzoruaren erabilera arautzen duen Hiri Antolamendurako Plan Orokorra (HAPO) definitzen jarraitzen dute Ondarroan. Duela gutxi amaitu da HAPOren aurrerakinari ekarpenak egiteko epea, eta herritarren eskura egon den dokumentua irakurri ostean gure ustez garrantzitsuak diren gai batzuk aintzat hartzeko eskatzen diogu. Aurrera begira zelako Ondarroa nahi dugunari buruzko ekarpen batzuk aurkeztu ditugu.

Kontua gogo handiagaz hartu dugu, eta ingurumen ikuspegia kontutan edukita, HAPOn txertatzeko hainbat proposamen egin ditugu. Dozena bat ekarpen inguru egin dizkiogu dokumentuari, eta non hobetu daitekeen ere jakitera eman dugu. Aurkeztu dugun ekarpen multzoa HAPOren hurrengo faserako lagungarria izatea espero dugu. Prozesuak aurrera egin ahala, gainera, gure ekarpenak aintzakotzat hartzea gustatuko litzaiguke.

Aieri ingurua “behingoz” berreskuratzeko eta ingurua ez moldatzeko eskatu dugu. Gure ustez, berreskuratu beharko litzatekeen interes ekologiko handiko naturgune bat da Aieri. Besteren artean, kanpin bat egiteko proposamena, kirol ekipamenduak ipintzeko edo intentsitateko baxuko etxebizitzak eraikitzeko eskariak ikusi ditugu, baina eremu hori, berez, gune babestu bat da eta legalki ezingo litzateke ezer egin.

Hondakin uren sarera konektatzea falta diren tartean ere HAPOren baitan sartzea eskatu dugu. Lehentasunezko esku hartzea dela deritzogu. Ur zikinen hodi biltzaile batzuk sare nagusira konektatu barik daude oraindik, eta gaia salatzen urteak badaramatzagu ere, gune batzuetako ur zikinak zuzenean Artibai ibaira isurtzen jarraitzen dute. Osasun zentroaren atzean, Zaldupe eta kiroldegi inguruan eta Artibai egoitza aurrean, esaterako, ur zikinak era etengabean isurtzen dira ibaira. Aspalditik egin beharreko kontua da, baina oraindik ere errekak kutsatzen jarraitzen dute.

Ildo horretatik, udalerriko ur baliabideak babesteko programa bat abiarazteko ere eskatu dugu. Gure akuiferoen egoera aztertu edo beste baliabide batzuk bilatzea interesgarria iruditzen zaigu.

Ezabatu beharko liratekeen landaretza inbaditzaileak dituzten eremuei buruzko iritzia ere eman dugu. Gero eta landare inbaditzaile gehiago dago gure inguruetan. Landare inbaditzaileak kalte handiak eragiten ari dira bertoko ekosisteman, eta lehenago edo beranduago legez derrigor egin beharreko kontua bihurtuko da. Neurriak lehenbailehen hartzen ez badira, gero zailagoa izango da horri guztiari aurre egitea.

Udalerrian merkataritza sektorea indarberritzeko jarduerak sustatzea eta areagotzea ere proposatu dugu. Berdura Plaza eta merkataritza zuzena bultzatzea ezinbestekoa dela diogu. Udaletxea Zeledonio Arriola eraikinera lekuz aldatzen badute, Berdura Plaza Musika Plaza azpian kokatu daiteke. Gaur egun Berdura Plazako gainea bota eta eremua aire zabalean lagatzea proposatu dugu. Gaur egun espazio hori zulo bat da. Modu horretara plaza argitsu bat bihurtuko litzateke.

Bestelako kontu batzuk ere aintzakotzat hartzea eskatu dugu. Kontu batzuek, gure ustez, presa handiagoa dute, baina beste kontu batzuk gutxinaka egiten joan daitezkeela iruditzen zaigu. Besteak beste, honako proposamenak egin ditugu: udalerrian turismo jasangarria sustatu eta garatzeko plan bat egitea, energia berriztagarriak erabili eta sustatzeko programa abiarazi eta tokiko erakunde bat sortzea, herri barrurako bidegorri bat eraikitzea, urteroko aurrekontutik bertoko basoak landatzeko lurrak erosteko diru sail bat gordetzea, Atxazpiko gunea berreskuratu atseden gune bat egiteko, portua berpizteko programa bat, garbigune bat eraikitzea,…